Psa 24 | MNA | STEP | Mboe ki Dabit Toono ramaki koroŋ boozomen ta timbotmbot pa na, katuunu ta Yooba. Lele ta boozomen mi kan tomtom bizin, ina ni kini men.

aMbo 50:12, 89:11, 1Kor 10:26

bUn 1:6; 2Pe 3:5

cMbo 15:1

dKam 20:16; Mbo 51:10; Mt 5:8

fMt 21:5; 1Kor 2:8

gKam 15:3+

Psalms 24

Mboe 24

Merere ni king zaanaŋana ta iur koroŋ ta boozomen

Mboe ki Dabit

1 Toono ramaki koroŋ boozomen ta timbotmbot pa na, katuunu ta Yooba.
Lele ta boozomen mi kan tomtom bizin, ina ni kini men. ^a
2 Pa ni ta iur toono ma imbot se yok ŋwaana.
Mi iparaama toono mbule tuunu ma tuŋ sula kat ta tai leleene a. ^b

3 Asiŋ ta irao be isala pa abal ki Yooba mi isuŋ pini?
Mi tomtom pareiŋana ta irao be ilela urum kini potomŋana mi imender su kereene uunu? Ina tomtom ta kembei: ^c
4 Ni ikam ŋoobo mbulu sa som. Mi leleene ma ŋgar kini na, iŋgeeze men.
Mi imbesmbeeze pa koroŋ pakaamŋan som,
mi ipombolmbol sua pakaamŋana som.
Tomtom ta kembei, ni ko irao be ilela. ^d
5 Mi Yooba ko ikampe i.
Anutu ta ulaaŋa kini na, ko ikamke i ma imbot ambai, mi ipaati be tomtom ndeeŋeŋana.
6 Tana zin wal ta kembena, ta tikam kinkiini be tiute Merere mi timbot kolouŋana pini.
Anutu ki Yakop, ina zin wal ta kembena ta timama kerem uunu.

7 O niom kataama ta boozomen, niyom ise mi kakaaga ma biibi.
Niom kataama aliŋgumoraŋoyom na, kakaaga ma itaanda kat.
Naso king zaanaŋana zalaana be imar ma iloondo piom. ^{▼▼(24:7) Re 2 Samuel 6:1-19. Sua Mbukŋana Ka Koror ta muŋgu imbot lela beeze ki Merere mi zin Israel tiziŋziŋ pa lele bilimŋana na, zin tire kembei Anutu itunu imbotmbot raama. Tana indeeŋe ta tisiŋ koror tana ma tilela pa Yerusalem na, tikam ŋgar kembei Anutu itunu ilela kar Yerusalem.
,} ^f
8 Lak, king zaanaŋana, ni asiŋ?
Ni Yooba tau!
Ni mbura keskeezeŋana mi mbolkeŋkeŋŋana.
Mi ni irao kat pa malmal. Pa namaana alalalŋana tau. ^g

9 O niom kataama ta boozomen, niyom ise mi kakaaga ma biibi.
Niom kataama aliŋgumoraŋoyom na, kakaaga ma itaanda kat.
Naso king zaanaŋana zalaana be imar ma iloondo piom.
10 Lak, king zaanaŋana, ni asiŋ?
Ni Yooba tau.
Ni mbura keskeezeŋana mi king zaanaŋana!